„Adaj upre them ajom taj upre bartschijom“
April 29th, 2014 | Published in Radio, Podcast & TV
Roma sam
Radijo Burgenland: 31.3.2014 (on demand)
But Roma ande sidlungtscha dschin. Butvar paschlon odola avral o foro. Afka te i lek barikaneder austritiki Romengeri sidlung andi Erba. Oja imar dujvar prik sidlim uli, kaj than avre bauninipeskere projektenge pekamlo ulo.
„Andi thaneskeri schpita Erba me upro them ajom taj andi adivesakeri pasche paschlimi Romengeri sidlung, jek schukar tschavengeri cajt man sina“, phenel i Manuela Horvath, projektoskero schero la CARLA-botatar andi Erba. „Me Erbate andi tschavengeri bar, andi flogoskeri ischkola taj andi hauptschul gejom taj i handlinipeskeri ischkola kisetintschom. Mro etnischi use kerinipe nisaj problemtscha mange antscha“, afka i Horvath bajder.
O papu logeriskero prik dschivdo sina
„Mro papu igen but pedar pre terdschijiptscha phukatscha“, phenel i Manuela Horvath. „Khetan leha ando logeri Mauthausen somahi, kaj mange ov oja kaschtuni sikatscha, ande save ov sovlahi“, phenel i Horvath.
Le klischejiskere alavenca sar „barikanipe“ taj jeke „automatischi khetanipeha“ avre dschenca andar lakeri flogoskeri grupn, i Manuela Horvath na dschanal tschatschikan valaso te kesdinel. „Me na identificirinav man tschak odoleha, kaj me jek „Romni” som, ham te odoleha, so me kerav“, phenel i Horvath. I but berschengeri Romengeri aktivistkija ande but projekti butschalinel. Jek hi o aktujeli ROMBAS-projekto, kaj vasch i arsiklipeskeri- taj sikadipeskeri situacija le Romendar taj Sintijendar dschal, phenel i Manuela Horvath. Adaj dschenencar andar i flogoskeri grupn vakeriptscha kerde on, save paloda evalujirim on, afka i Horvath bajder.
Klischeji te adi meg presenti hi
„Te adi, o Roma meg le schelberschengere phure klischejijenca konfrontirim hi“, phenel i Manuel Horvath. „Butvar phutschen man o dschene, sar o esbe lipe ojs ladipeskero flogo hi, sar oda hi le ischkolakere kherodipeha taj but avre phutschajiptscha, save meg adi ande igen but schere odole manuschendar presenti hi, save pumen la temaha Roma tschak igen tschule vaj na, donde bescharen“, afka i Horvath bajder. Buteder pedar, schunen tumen andi sendung „Roma sam“ upro Radijo Burgenland.
